【肥波去街街】荃灣峰味清雞湯米線
#一個人開飯系列 #自費 #荃灣 #峰味清雞湯米線 #超主觀食後感
肥仔喺荃灣返工，所以我成日都會去搵佢，我唔係荃灣打手嚟㗎！
放心啦下一次出街唔會再係荃灣住㗎喇！
尋日本來諗住去食上次有好多網友提嘅Mr & Ms Burger，
我四點左右去到點知摸門釘，因為網上睇嘅資料無提到落場時間，原來晚市要五點先開。
所以臨時睇返bookmark咗嘅其他餐廳，去咗比較近嘅峰味清雞湯米線。
位置喺煙燻玉子燒隔幾個鋪位，係外賣店嚟，無得坐低食嘅。
店面貼滿咗餃子相、訪問、仲大大隻字寫住「新鮮健康」﹑「一口餃子七年心血」，
健康呢兩隻字係吸引唔到我嘅，反而對自家熬製嘅雞湯同手工餃子有興趣。
先叫咗份清雞湯餃子（$15-4隻/$20-6隻/$24-8隻），
落單後即時煮（餃子已包好），大約等咗五分鐘。
個淡淡嘅奶白色嘅清雞湯底，真係同自己喺屋企足料咁煲好多個鐘嘅雞湯一樣果種味道，
係用雞煲出嚟，唔是落雞粉或者現成雞湯果種味，夠味得嚟又唔太鹹，我鍾意呀！
餃子飽滿，一食落口第一感覺係個皮好滑！真係好滑！good！
餃子皮厚薄適中，入面包住豬肉+蔬菜餡。
咬開先食到一大陣蔬菜嘅味，入面有椰菜、白菜、韭菜、少量蔥，當然仲有豬肉。
佢寫明用極小肥嘅豬肉，入面雖然唔乾有汁，但唔係油潤果種湯汁，係清爽嘅口味。
我仲試咗佢嘅煎餃（$28-8隻/$35-10隻），
呢個要等耐少少，因為即叫即煎，要十分鐘左右。
煎得透，非常焦香，脆口但唔會過硬，
煎餃嘅爆汁效果比湯餃更明顯，
餡料同湯餃嘅一樣，但煎出嚟嘅的確係香口啲。
佢自家製嘅辣醬入面有小魚乾，好有誠意！
仲有賣竹蔗茅根、雪梨水、烏冬，
除咗清雞湯仲有「四國魚湯」，
據說係用日本四國嘅魚乾嚟熬，
其實我都好想試埋不過實在太飽。
老闆好落力咁同客人溝通，強調佢地手工做餃，
每日新鮮預備材料，餃子係日本配方，健康得嚟又好食。
其實話自己煮十幾廿個鐘煮一樣嘢出嚟呢啲說話唔會好打動到我，
你要明白，煮幾耐都好，都唔代表啲嘢一定好食。
我亦無果啲乜柒小店情意結，唔會因為間鋪好細好local就要讚，
你估「小店」無伏呀？我呀，年中呀，都唔知中幾多次伏呀！
但係，呢間峰味清雞湯米線，真係無伏。
而且啲食物真係食得出店家有幾用心，
咁嘅價錢，咁嘅味道，好抵呀！
未至於到要山長水遠專登去食嘅地步，
但去開荃灣又想搵嘢食，不妨去試一次！
店名：峰味清雞湯米線
地址：荃灣鱟地坊80-84號華成樓B座B6地舖
落Order電話：68069582
峰味清雞湯米線
Search